ഉദ്ദേശം 475 വർഷങ്ങൾക്ക് മുൻപ് പന്തളം രാജാവ് കൊടുങ്ങല്ലൂരിൽ പോയി മടങ്ങുമ്പോൾ കുറവിലങ്ങാട്ട് പള്ളിയിലും പരിസരത്തും കൂടിയിരുന്ന ആൾക്കൂട്ടവും ആഘോഷങ്ങളും രാജാവിനെ വളരെ ആകർഷിച്ചു.  രാജാവ് അതിനെപ്പറ്റി തിരക്കിയപ്പോൾ കുറവിലങ്ങാട്ട് പള്ളിയിൽ ആണ്ടുതോറും നടത്തിവരാറുള്ള മൂന്നു നോമ്പിലെ ഇടനോമ്പിലുള്ള പെരുന്നാൾ ആഘോഷമാണെന്നും,  കുറവിലങ്ങാട് ക്രിസ്ത്യാനികളുടെ ഒരു കേന്ദ്രം ആണെന്നും അറിയാൻ കഴിഞ്ഞു. ഭക്തിനിർഭരമായ പെരുന്നാൾ ചടങ്ങുകളും സൗഹാർദ്ദ പൂർവ്വമായ വൈദിക-അവൈദികരുടെ പെരുമാറ്റവും രാജാവിനെ അതീവ സന്തുഷ്ടനാക്കി. വിശുദ്ധരും, നിഷ്കളങ്കരും, കുലീനരുമായ ഒരു ക്രിസ്തീയ കുടുംബത്തെ പന്തളം ശാസ്താക്ഷേത്രത്തിലെ തൈലാദികൾ തൊട്ടു ശുദ്ധമാക്കാൻ പന്തളത്തേക്ക് അയക്കണമെന്ന് രാജാവ് ആവശ്യപ്പെട്ടു രാജാവിൻറെ ആവശ്യം അംഗീകരിച്ചു കുറവിലങ്ങാട്ട് പകലോമറ്റം കുടുംബത്തിൽപ്പെട്ട പനംകുഴയ്ക്കൽ ശാഖയിലെ ഒരു കുടുംബം പന്തളത്ത് വരികയുണ്ടായി കുറവിലങ്ങാട്ട് നിന്നും വന്ന ക്രിസ്ത്യൻ കുടുംബം രാജാവിൻറെ നിർദ്ദേശപ്രകാരം പന്തളം തെക്കേ കൊട്ടാരത്തിനടുത്ത് ചിറത്തലയ്ക്കൽ എന്ന സ്ഥലത്ത് താമസിച്ചു. പന്തളം വലിയ പാലത്തിന് തെക്കായി സ്ഥിതി ചെയ്യുന്ന സ്ഥലമാണ് ചിറത്തലയ്ക്കൽ. തൈലാദി വസ്തുക്കൾ അശുദ്ധമായാൽ പൗലോസ് തൊട്ടാൽ ശുദ്ധമാകും എന്ന് ഐതിഹ്യം ഉണ്ട്. പക്ഷേ കാലക്രമത്തിൽ ഈ ചടങ്ങ് നിന്നു പോവുകയാണ് ഉണ്ടായത് കുടിയിരുത്തിയ കുടുംബത്തിന് അനേകം സ്ഥാനമാനങ്ങൾ രാജാവ് കൽപ്പിച്ചനുവദിക്കുകയും പലസ്ഥലങ്ങളിലും നിലവും പുരയിടവും പതിച്ചു കൊടുക്കുകയും ചെയ്തിട്ടുണ്ട്. ഈ വിവരങ്ങളെല്ലാം മുൻതലമുറക്കാരിൽ നിന്നും വാമൊഴിയായി ലഭിച്ചിട്ടുള്ളതാകുന്നു. പന്തളം താമസമാക്കിയ കുടുംബം കാലക്രമത്തിൽ വർദ്ധിച്ച് ശാഖകളും ഉപശാഖകളുമായി പടർന്നു പന്തലിച്ച് ഇപ്പോൾ ഏകദേശം 600 ഭവനങ്ങളോളം ഉണ്ട്. കാലക്രമേണ വന്നു താമസിച്ച കുടുംബത്തിൽ നിന്നും ഒരു പിതാമഹൻ പന്തളം ജംഗ്ഷനു സമീപം മൂലയിൽ മാറി താമസിച്ചു അദ്ദേഹത്തിൻറെ പിൻഗാമികളാണ് മൂലയിൽ ശാഖയുടെ 9 ഉപ ശാഖകളിലെ അംഗങ്ങൾ, അതുപോലെ ഒരു പിതാമഹൻ പന്തളം ജംഗ്ഷന് പടിഞ്ഞാറ് മുട്ടാറിന് സമീപം ഇടത്തറ മാറി താമസിച്ചു ഇങ്ങനെ ഇടത്തറ ശാഖ നിലവിൽ വന്നു, ഈ പിതാമഹന്റെ പിൻതലമുറക്കാർ ഇപ്പോൾ 9 ശാഖകളായി അറിയപ്പെടുന്നു